Лингорсын Боловсролын байгууллагын Гүйцэтгэх захирлаар Хүрэлийн Нинж-Эрдэнэ ажиллаж эхэллээ.

Тэрээр АНУ-ын Фулбрайтын тэтгэлэгт хоёр удаа шалгарч, Нью-Йорк Мужийн Их Сургууль (State University of New York)-д англи хэл заах арга зүй (TESOL)-ын чиглэлээр магистрын зэрэг хамгаалсан. 2005 оноос хойш Монгол болон Олон улсын түвшинд англи хэлний боловсрол, багшийн мэргэжлийн хөгжил, сургалтын арга зүйн чиглэлээр идэвхтэй ажиллаж ирсэн бөгөөд Academia Англи Хэлний Институтийн хамтран үүсгэн байгуулагч, Монголын Англи Хэлний Багш Нарын Холбооны дэд ерөнхийлөгч, Монголын Англиар Уншигчдын Холбоо (MERA)-ны Удирдах Зөвлөлийн даргаар ажиллаж ирсэн.

Мөн тэрээр EnglishPowered цуврал ном болон I Love My Family хүүхдийн зурагт номын зохиогч юм.

Та бүхэн Х.Нинж-Эрдэнэ захирлын Лингорсын дараагийн хөгжлийн үе шат, байгууллагын үнэт зүйлс, алсын хараа, мөн боловсролын талаарх сонирхолтой үзэл бодлоо хуваалцсан энэхүү ярилцлагыг шимтэн уншаарай.

Эхлээд таны карьерын замналаас яриагаа эхэлье. Өнөөдрийг хүртэлх мэргэжлийн замналаасаа товчхон хуваалцвал?

Миний ажлын гараа их сургуулийн гуравдугаар курсын оюутан байх үеэс эхэлсэн. Тухайн үед Бангкок хотын олон улсын дунд сургуульд англи хэлний багшаар ажиллаж байлаа. Оюутан байхдаа олон улсын орчинд багшилсан тэр туршлага надад боловсрол гэдэг зөвхөн мэдлэг дамжуулах бус, хүний ертөнцийг харах өнцгийг тэлэх үйл явц гэдгийг ойлгуулсан. Түүнээс хойш англи хэлний боловсрол, сургалтын хөтөлбөр багшийн хөгжил, үнэлгээний систем, мэргэжлийнхээ туршлага дээр үндэслэн ном ч гаргалаа.

Одоо ингээд технологид суурилсан олон нийтэд гадаад хэлний боловсрол олгох зорилготой Эдтек салбар руу ороод байна даа.

Та Лингорстой анх хэзээ, хэрхэн холбогдож байсан бэ?

Лингорс англи хэлээр ном унших арга зүй цахим уншлагын хөтөлбөрийг Монголын их, дээд сургуулиудад нэвтрүүлж эхэлсэн үеэс би үйл ажиллагааг нь сонирхож эхэлсэн. Тухайн үед би Англи хэлний багш нарын холбооны удирдах зөвлөлд ажиллаж байсан учраас удалгүй Лингорсын багшийн хөгжлийн хөтөлбөрүүдэд зочин илтгэгчээр оролцож, удалгүй өөрийн номоороо дамжуулан зохиолчтой уулзах цаг зэрэг арга хэмжээнд нь тогтмол уригддаг болсон.

Лингорс өөрсдийн цахим уншлагын марафон хөтөлбөрөөрөө нийслэлийн дүүргүүд алслагдсан сум, орон нутаг гээд үндэсний хэмжээнд англи хэлний багш нарыг уншуулж чадсан. “Нэг багшийг хөгжүүлснээр олон суралцагчид хүрч болно” гэдгийг үйлдлээрээ бодитоор харуулсан.


Тэгээд 2024 онд Лингорсын дэргэдэх MERA буюу Монголын англиар уншигчдын холбооны УЗ-ийн даргаар ажиллах санал хүлээн авснаар Лингорстой албан ёсоор холбогдсон гэж хэлж болно.

Лингорсын гүйцэтгэх захирлын албан тушаалын саналыг анх хэрхэн хүлээж авсан бэ?

Лингорсыг үүсгэн байгуулагч Оюунтуяа захирал бид 2 ажил хэргийн шугамаар энэ тэнд их тааралддаг байсан л даа. Оюунтуяа захирал шинэ санаанд маш нээлттэйгээс гадна түүнийг бодит ажил болгон хөрсөн дээр буулгахдаа чадварлаг хүн. Уулзах бүрдээ асуудал ярих биш харин шийдэл хайсан зүйл ярьдаг байсан.

Тухайн үед Лингорсын үйл ажиллагааг ерөнхийд нь гадарладаг байсан. Англи хэлний боловсролд технологийн шийдлийг амжилттай нэвтрүүлж байгааг хараад энэ ажилд хүч нэмэх хүсэл төрсөн. Учир нь том өөрчлөлтийг нэг хүн ганцаараа хийх боломжгүй. Чадварлаг баг, зөв хандлага, хамтын итгэл үнэмшил нийлж байж бодит үр дүн гардаг.

Та яагаад унших нь хэл сурахад хамгийн үр дүнтэй арга гэж үздэг вэ? Уншлага яагаад Лингорсын хамгийн чухал үнэт зүйл хэвээр байх вэ?

Хэлийг зөвхөн үг цээжилж, дүрэм судалж, Youtube, Netflix үзээд бүрэн эзэмшдэг гэвэл үгүй ээ. Хэлийг утга уран зохиолоор дамжуулан эзэмших боломжтой. Унших үед суралцагч үгийн сан, дүрэм, өгүүлбэрийн бүтцийг тус тусад нь биш, нэгэн цогц байдлаар хүлээн авдаг.


Тогтмол уншдаг хүн хэлний талаар бодохоо больж, тухайн хэлээр бодож сэтгэж мөрөөдөж эхэлдэг. Энэ бол хэл сурах хамгийн чухал шилжилт. Ном уншсанаар зөвхөн хэлний чадварыг хөгжүүлээд зогсохгүй анхаарал төвлөрөл тэвчээр, төсөөлөл, шүүмжлэлт сэтгэлгээ, эерэг хандлага ном дээр гарсан дүрүүдээр дамжуулан бусдыг ойлгох чадварыг цогцоор нь хөгжүүлдэг.

Англи хэлний боловсролын салбарт олон жил ажилласан хүний хувьд өнөөдөр ч таныг чиглүүлдэг хамгийн чухал сургамж юу вэ?

Хүн төрөлхтний хувьд хэл гэдэг зүйл зөвхөн харилцааны хэрэгсэл бус, харин бодох, төсөөлөх, туршлагаа хуваалцах боломж олгодог. Тухайн хэл устахад зөвхөн үгс алга болдоггүй. Тэр хэлээр дамжигдан ирсэн ертөнцийг харах өнцөг, түүх, соёлын үнэт зүйлс, онцлог давуу талууд, тухайн үндэстний сэтгэлгээний нэг хэсэг хамт мөхөж алга болдог. Ямар нэгэн хэл дээр унших нь бидний өөрийн туршлага, тархины багтаамжаас давж сэтгэх боломжийг нээдэг.


Хүний амьдрал богино, туршлага хязгаартай. Бид бүхнийг багшаар заалгаж сурах боломжгүй. Харин утга уран зохиолын номоор дамжуулан олон зуун хүний амьдрал, үе дамжсан амьдралын ухаан, өөр өөр орны соёлт ертөнцөөр аялж чадна. Ном уншдаг хүн хэзээ ч оюун санааны хоосролд ордоггүй.

Таны бодлоор Лингорс боловсролын салбарт ямар өөрчлөлтийг авчирч чадна гэж харж байна вэ?

Боловсролын эцсийн зорилго нь зөвхөн шалгалтад сайн дүн авах биш, харин нийгэмдээ хэрэгтэй, хариуцлагатай иргэн болж төлөвших явдал. Өнөөдрийн байдлаар дэлхийн улс орнуудын хоорондын харилцаа улам төвөгтэй ээдрээтэй болчихсон байна. Ийм орчинд зөвхөн англи хэл мэддэг байх хангалтгүй. Дэлхийн иргэн байхын тулд хоёр дахь, гурав дахь хэл эзэмшиж, өөр соёлын хүмүүсийн хэл соёлыг ойлгох хүндлэх дипломат, уян хатан, хүнлэг байдлаар харилцах шаардлагатай болж байна. Бид саяхан хэл сурах арга зүйд суурилсан gaming шийдэлтэй олон хэл дээр унших боломжтой аппликейшны нээлтийг хийсэн.

Mанай апп зүгээр нэг апп биш - технологи, багш, суралцагч, сургууль, контент бүтээгч, хэвлэлийн байгууллага, мэргэжлийн холбоодыг холбосон боловсролын экосистемийг бий болгохыг зорьж байна.

Лингорсын урт хугацааны алсын хараа, эрхэм зорилгын талаар?

Бидний алсын хараа бол олон хэлний дархлаатай, тэгш хүртээмжтэй боловсролын экосистемийг бий болгох. Олон хэлний дархлаа гэдэгт бид Mонгол хэлээ хамгийн түрүүнд багтаасан. Mонголын хүүхэд залуус уншихаа больсон байна гэсэн шүүмжлэлт их өртдөг. Энэ зөвхөн манай залуус уншихгүй байгаа зүйл биш. Ковидоос хойш энэ бүр дэлхийн бүх улс орнуудын хувьд асуудал болоод ирсэн. Одоо үеийнхэн цаасан ном унших дургүй болсон. Тиймээс тэдэнд дижитал хэлбэрт нь тохирсон аргаар унших чадварт сургах нь улс гүрний боловсролын бодлого байх ёстой.


Лингорсын хувьд бид системтэй арга зүй, инновацад суурилсан шийдлээр хүн бүрд эх хэлээр болон сургуулийн хөтөлбөрийн хүрээнд сонгон суралцаж байгаа гадаад хэлээр унших боломжийг бий болгож өгч байгаа. Цахимд суурилсан учраас смарт утастай хүн бүр аппаа татаж аваад хаанаас ч ороод унших боломжтой.

Бид хэрэглэгч нараа зөвхөн Mонголоор гэж харахгүй байгаа. Mэдээж хэдэн зуун мянган хэрэглэгчтэй олон хэлний уншлагын платформ болохыг зорьж байна. Гэхдээ бидний амжилтыг зөвхөн хэрэглэгчийн тоогоор хэмжихгүй. Хүмүүст шинэ боломж нээж, өөрсдийн гэсэн соёл, хэл, үндэсний онцлогоо номоор дамжуулан хадгалуулан үлдээж байгаа нь манай аппын үнэт зүйл.

Гүйцэтгэх захирлын хувьд эхний ээлжид юунд төвлөрөн ажиллаж байна вэ?

Эхний ээлжийнд Лингорс аппын олон хэлний тогтолцоог бэхжүүлэх, хэл сурах арга зүйд суурилсан чанартай номуудыг апп дээрээ байршуулах дээр төвлөрч байна. Одоогоор Mонгол, Англи хэл дээр ном ороод эхэлчихсэн байгаа. Удахгүй Солонгос хэл Хятад хэл Япон хэл дээр суралцагч нарт зориулсан номуудыг нэмж оруулахаар манай баг хамт олон ажиллаж байна.

Эцэст нь Лингорстой хамт өсөж, хөгжиж буй нийт хүмүүст хандаж юу хэлэхийг хүсэж байна вэ?

Юуны түрүүнд өнөөг хүртэлх хугацаанд Лингорстой хамт байсан багш суралцагч нар, эцэг эхчүүд хамтрагч сургуулиуд боловсролын байгууллагууддаа чин сэтгэлээсээ баярлалаа гэж хэлмээр байна. Ялангуяа өөрсдөө тогтмол уншиж, сурагчдадаа үлгэр дуурайлал үзүүлж байгаа багш нарын оролцоо бидний хувьд маш үнэ цэнтэй. Бидний ирээдүй ямар байх нь өнөөдөр хүүхдүүд маань юу уншиж, юу сурч, юунд итгэж байгаагаас ихээхэн хамаарна. Уншдаг хүн өөрийнхөө төдийгүй нийгмийнхээ ирээдүйг өөрчилж чадна. Тиймээс өдөр бүр багахан хугацааг уншихад зориулж, хүүхэд бүрийг номтой нөхөрлүүлэх энэ үйлсэд бидэнтэй хамт байгаарай.


Лингорс апп хүн бүрд зориулагдсан - зохиолч нар, паблишинг компаниуд, багш нар, хүүхэд залуус, гадаад хэл суралцагч нар, номын хорхойтон гээд.

Лингорс олон хэлний аппликейшн

Хэл сурахыг хэцүү зүйл гэж битгий бод.
Зүгээр л хүссэн хэлээрээ өдөр бүр хэдхэн минут ном унш.
Уншихыг зуршил болгосноор шинэ хэл аяндаа чиний амьдралын нэг хэсэг болно.

IOSAndroid